Руслан Нажимов ҳаққында қысқаша
мағлыўмат:
2010-жылы Аль Хорезмий атындағы
Ташкент Информация технологиялары университети Нөкис филилалын тамамлаған.
Карақалпақ мәмлекетлик университети
академиялық лицейи информатика пәни оқытыўшысы, ϴзбекстан жаслар аўқамы Басланғыш
шөлкем жетекшиси.
29 жас.
Өмирдеги ураны: Хәмийше алға!
Идеалындағы каҳарман: Ана.
Алдына койған мақсети:
Жасларды жетикликке жетелеў.
Жаксы көрген китап авторы: Ибрайим
Юсупов.
Хоббйи: Дуўтар шертиў.
«Хәмийше алға!» - дейди устазымыз озиниң
өмирдеги уранын айта отырып. Руслан Нажимов жасаўладтың қәбилетин раўажландырыў
ҳәм ўатан ушынжанып жасайтуғын жетик жасларды жетилдириў,
сондай-ак оларды ҳәрдайым алға умтылдырыўды өз алдына максет еткен.
- Елимизди ҳақыйқый имканиятлар журты десек
асыра айтқан болмаймыз. Себеби, жаслар менен ислесиўши шөлкемлер – бурынғы
«Камолот» ЖЖХ ҳәм бүгин өзине миллионлап жасларды қамтыған ϴзбекстан жаслар
аўқамы сөзимиздиң айкын дәлийли. Бул аўқам жаслардың турмысында үлкен әҳмийетке
ийе, ҳәттеки жасларымыздың шын мәнистеги қол-қанатына айланбақта. Ондағы
имканиятлар да күннен-күнге көбейип, шәрт-шәраятлар жаратып берилмекте. Кала
берсе, Жаслар аўқамының белсендилери болған орта арнаўлы билим журтлары
оқыўшыларына да бир қанша жеңилликлер болып, олар жоқары оқыў орынларына имтихансыз
кириў имканиятын қолға киритпекте,-дейди жетекшимиз жаслар ҳаққында сөз ашар екен.
– Бизиң лицейимиз де талантлы ҳәм билимли жаслар кәмал таўып атырған
дәргайлардың бири. Лицейимизде бир қанша таңлаўларға қатнасып атырған жеңимпазлар,
өз мийнети ҳәм жетискенликлери арқалы Зулфия атындағы мәмлекетлик сыйлықтың лауреатлары
жетилисип шықпакта. Соның менен бир қатар, «Журт келешеги», «Жоқары мәнаўиятлы әўлад»,
«Уллы мақсетлерге умытылыўшылар», «Жас китапхан» танлаўлары ҳәм Жаслар аўқамының
бир қанша илажларында белсене қатнасып, жеңимпазлықты қолға киргизип келмекте.
Атап айтатуғын болсак, Айгул Жийенбаева, Гулжайна Пахратдинова, Динора Бегдуллаева,
Сапура Темирханова хәм Айдана Алламбергеновалар қәбилетли ҳәм дөретиўши жасларымыздың
қатарында, - дейди Руслан Нажимов оқыўшыларының жетискеликлери ҳаққында
толып-тасып.
Жетекшимиз бенен қурған сәўбетимиз барысында
оның бир қанша жетискенликлерине көзимиз түсти. 2017-2018-оқыў жылы даўамында ϴзбекстан
Жаслар аўқамы Нөкис қалалық Кеңеси тәрепинен өткерилген илажларға жасларды белсене
қатнастырғанлығы ушын «Хүрмет жарлығы» менен сыйлықланғанлығы итибарымызды тартты.
- Мениң бул нәтийжеге ерисиўимде сизлердиң
– талантын еле де асырып, үлкен жетискенликлерге ерисип киятырған жаслардың
орны гиреўли,- деп устазымыз өз қанаты астына бирлестирген жасларына
миннетдаршылығын билдирди.
Жақында ғана Руслан Нажимов басшылык етип
ҳәм таярлап киятырған китапқумар жаслардан қуралған лицей командасы «Уллы мақсетлерге
умытылыўшылар» пайтахт китапқумарлары танлаўында сыйлы 1-орынды ийеледи. Ал, булл
болса, лицей оқыўшылары менен бир қатар жетекшимиздиң де салмақлы мийнети есапланады.
Мәмлекетимиз келешеги болған жасларды жетикликке
жетелеп, оларды жоқары мәнаўиятлы әўлад етип тәрбиялаўда ғайрат салып ислеп
атырған жетекшимиз Руслан Нажимовқа жетекшилик ҳәм машақатлы мийнетинде,
сондай-ақ алдағы жумыслары ҳәм өмиринде үлкен табыслар, талмас күш-жигер тилеп
қаламыз.
Динора
Бегдуллаева
Карақалпақ
мәмлекетлик университети
Академиялық
лицейи 2-басқыш оқыўшысы.
Өзбекстан
Жаслар аўқамы КР Кеңеси
жанында
дүзилген
«Жас
журналистлер» клубы ағзасы
