(gúrriń)
Bir kúni Bibizadanıń aǵası
úyine qalta arqalap keldi. Bunı kórgen Bibizada aldına juwırıp shıqtı da, dárhal
qaltaǵa úńildi. Qarasa, ana pıshıq hám onıń jıbırlasqan balaları eken.
Qızı quwanǵanınan
aǵasın qushaqlap aldı da: - «Aǵa, bulardı qayaqtan tawıp aldıń?»,-dedi. «Jumıstan
shıǵıp kiyatırsam, qulaǵıma pıshıqlardıń dawısı esitildi. Ján-jaǵıma qarasam, shópliklerdiń
arasında bir nárse kórindi. Jaqınlap barıp kórsem, qaltaǵa pıshıqlardı salıp, awzın
bekkem buwıp, taslap ketipti. Olar jan aybat penen miyawlar edi. Qaltanıń awzın zorǵa sheshtim de biraz samallattım.
Soń pıshıqlardı úyge alıp kele berdim», - dedi. Negizi, bul biyshara jániwarlar
awıldaǵı Nısanbay aǵanıń pıshıqları edi. Ol bir kúni ana pıshıqtıń óz úyinde dásturxanǵa
urınıp, urlıq islep atırǵanın kórip qaldı. Sonda ol anası urlıqshı pıshıq bolǵannan
keyin, balaları da sonday boladı, degen oyǵa keldi hám barlıǵın qaltaǵa salıp, dúzge
taslap ketipti.
Anası pıshıqlardı qaltadan alıp atırıp: «Biysharalar
tońıp qalıptı ǵoy»,- dedi olarǵa janı ashıp. Keyin, Bibizada olarǵa sút berdi.
Pıshıq
balalarınıń qarnı toyǵannan soń, bir-biriniń bawırına kiriwi menen jıllı jerde uyıqlap
qaldı.
Azanda Bibizada
pıshıqları menen oynaw ushın olardı atız tárepke alıp shıqtı. Pıshıqlardıń dawısın
esitken iyti Qutlıayaq dárxal keteginen shıǵıp, olarǵa táp berdi.
Ana pıshıq balalarınıń
aldına shıǵıp, olardı qorǵadı. Qutlıayaq olarǵa úre basladı. Bibizada qorqıp ketip,
baqırıp jiberdi. Anası qızınıń dawısın esitip, úyinen atlıǵıp shıqtı. Qutlıayaqtı
quwıp jiberdi. Qız pıshıqlar menen oynap, soń olardı úyge alıp kirdi. Ana pıshıq
negedur tınıshsızlana berdi. Anıqlap qarasa, bir balası kemis eken. Sonnan Bibizada
dalaǵa juwırıp shıqtı. Bir waqıtta pıshıqtıń qattı miyawlaǵan dawısı esitildi. Qarasa,
iyti oǵan aybat shegip atır eken. Ana pıshıq balasınıń dawısın esitip, úyinen juwırıp
shıqtı da, Qutlıayaq penen alısıp ketti. Anası olardı zorǵa ayırıp aldı. Pıshıq
ayaǵınan jaraqatlandı. Ol kóp kúnge deyin júre almay jattı. Bibizadanıń anası pıshıqtıń
jaraqatına dári jaǵıp emledi.
Aradan kóp ótpey,
ana pıshıq balaları menen emin-erkin oynaytuǵın boldı. Sebebi, Qutlıayaq pıshıqlarǵa
taslanatuǵın ádetin qoydı-dá.
Bir kúni Bibizada
dalaǵa shıqsa, pıshıqtıń balası iytiniń murnına kishkene pánjesin tiygizip oynap
atırǵan eken.
Qız iyti tislep alar-aw, dep qorqıp edi, biraq Qutlıayaq oǵan tiymedi.
Qaytama olar dos bolǵanday bir-biri menen oynadı.
Ol iyti menen pıshıqlarınıń doslıǵına
hayran qaldı. Óytkeni, ol pıshıq penen iyttiń hesh qashan dos bolǵanın kórmegen
edi-dá!
Dinora BEGDULLAEVA
Комментариев нет:
Отправить комментарий