Poeziya

ANA WATANIM

Ana watanımnıń samalı basqa,

Ana watanımnıń topıraǵı basqa.

Jat ellerdiń marjan, ǵáziynesine,

Almaspayman hesh te altın-almazǵa.

Ana watanımda tábiyat gózzal,

Ana watanımda baǵlar shámenzar.

Hindistan, Záńgistan kibi ellerden,

Ana jerim sulıw, tórt pasılı bar.

ÓZBEKISTAN

Ózbekistan – dańqı dástan elimiz,

Búlbúller sayrasqan shámenimiz,

Eń ullı hám eń áziz, húr jerimiz.

Biz jaslar watannıń júregimiz.

Ilimde hám sportta da jetekshi,

Rioda hám Aziyada da birinshi.

Bálent shoqqı, rekordlarǵa jetpekshi,

Ul-qızlarıń atıń dástan etpekshi !

  

WATAN

Biz tuwılıp ósken jer,

Dalaları saqıy, keń,

Gúllene bersin kún sayın,

Xızmetine biz tayın.

Áwladımız Alpamıstıń,

Qızlarımız Tumaristiń.

Tuwǵan ana topıraǵın,

Janın berip qorǵar bárin.

QARAQALPAǴIM

Qaraqalpaǵım tariyxı miyraslarǵa bay,

Jıraw, baqsı, shayır ótken birtalay,

Qıssaxan, sheshenler misli xalqaday,

Ruwxıy qúdiretim, Qaraqalpaǵım.

Xalıqtıń turmısın barday sóz etken,

«Shopanlar» táǵdirin elge kóz etken,                                                                    

Nebir uyqaslardı oyıp bezetken,

Kúnxoja babamsań, Qaraqalpaǵım.

«Bozataw» da bozlap Ziywar shayırıń,

Betine tik aytqan xannıń ayıbın,

«Ellerim bardı»dep sózdiń qayımın

Tawǵanda ózińseń, Qaraqalpaǵım.

Qorǵap el-xalıqtıń arın-namısın,

Birlikke shaqırǵan jaqın-alısın.

Hurliman baqsı qız ilxam arısı,

Berdaq shayırımsań, Qaraqalpaǵım.

Dinora BEGDULLAEVA